كلمتين كان لازم يتقالوا..

أنا مش عارفة أكتب!!!

بقالي فترة عايزة أكتب ومابكتبش.. الكلام اللي جوايا مش راضي يطلع، مش عارفة أصيغه في كلمات .. فقلت أجي هنا وأكتب أي حاجة.. حتى لو هابدأها ب"أنا مش عارفة أكتب."

ده أنا حتى بكتب هنا على طول .. يعني عادةً الفترة اللي فاتت لما بحب أكتب بروح أكتب على التليفون عندي الأول، وبعدين أنقله هنا بعد ما كله يتظبط ويبقى تمام .. بس قلت المرة دي مش هاعمل كدة وهادخل في الموضوع على طول..

ايه هو بقى الموضوع؟!! .. بقالي فترة بيحصلي حاجات كتير قوي .. حاجات كتير ممكن أكتب عنها جدًا، أو أكتب في ضوئها كدة :) .. لكن مابكتبش .. مش عارفة أعبر وأقول .. ده أنا حتى بقيت بانسى المواقف، يعني مش بقف عندها وأفكر فيها وأشوف بيحصل فيها ايه .. مش زي ما أنا متعودة يعني .. وللأمانة، ده مضايقني .. مخليني حاسة إني عايشة كدة وخلاص .. هو اه فعلًا ده الإحساس اللي حساه الفترة دي.. إني عايشة كدة وخلاص.. حاسة إني بجري عشان الأيام تخلص بسرعة عشان مش عاجباني .. ولما اقعد أفكر هي مش عاجباني ليه، مابلاقيش إجابة مقنعة الحقيقة .. بس بقول تمام يعني إذا أنا شايفة كدة ف تمام.. كل المشاعر دي لازم تُحترم .. لكن يعني ايه أخرتها؟! طب ايه أسبابها، مش لازم نعرف؟!

حاسة إني عايشة في حلقة مفرغة .. أو في فراغ كبير مش معروف له حدود.. بلف على الفاضي، أو حتى مابكملش اللفة لأخرها.. في كل لفة باجي عند حتة معينة كدة وأروح بادئة من الأول .. يا إما زهقت بقى يا إما مش عاجباني اللفة دي .. أهو أي كلام وخلاص .. وكأني أدمنت البدايات.. البدايات فقط .. كلام عميق وكدة، مش كدة؟!

يمكن أكتر حاجة بتعلمها دلوقتي هي إني أقرص على نفسي.. عارفين القرصة دي.. زي اللي بيلعب رياضة، فيه لقطة كدة بيجي عندها ويتعب.. هي بقى اللحظة دي، لو عداها وكمل هيروح في حتة تانية خاااالص.. إنما لو وقف ورجع يبدأ من الأول كل مجهوده اللي فات ده هيروح في الأرض .. هي القرصة على النفس دي اللي أنا بتعلمها .. بس أنا عمري ما حبيت فكرة القرص على النفس أو إني أغصب نفسي على حاجة .. مع إني بعملها.. وبعملها كتير .. إني استحمل شوية تعب زيادة من غير ما اتكلم مثلًا .. يعني أنا أصلًا بعرف أجي على نفسي كويس يعني .. ف ايه بقى؟ ايه اللي ناقصني اتعلمه؟! 

بس هو فيه فرق بين إني استحمل وما اتكلمش .. وبين القرص على نفس .. إني أجي على نفسي ده معناه إني بظلمها .. لكن إني أقرص على نفسي ده معناه إني بعلمها حاجة جديدة .. شوفتوا المعنى فرق إزاي؟! يبقى اللي بتعلمه هو إني أعرف إزاي اتعب شوية عشان نفسي.. عشان مصلحتي يعني.. مش التعب اللي هو ضد مصلحتي.. التعب الصحي مش التعب المضر.. التعب اللي بيوصل لنتيجة مُفرحة، مش التعب اللي بيوصل لتعب زيادة .. المشكلة انهم الاتنين تعب، ف بيبقى صعب التفرقة بينهم شوية.. بس اديني بتعلم ..

بتعلم حاجة كمان.. انه الأحوال بتتغير .. يعني بتعلم اني أعرف أعيش حالة في لحظة من غير ما أتعلق بيها .. يعني ابقى عايشة الحالة ووأنا عايشاها ابقى عارفة إنها حالة وهتخلص وهتروح لحالها.. فايه بقى.. ف انبسط بالحالة اللي أنا عايشاها وما أشيلش هم إنها ممكن تفضل معايا كتير .. أو أشيل هم إنها هتروح مني وهازعل من غيرها .. بتفرق .. بتفرق كتير .. بس حتى التعلق محتاج اننا نقبله عشان مايضايقناش .. اللي هو يعني حتى لو تعلقت شوية، معلش.. هو شوية وهيروح لحاله .. حصل خير ..

أصلًا إحنا شوية وماشيين.. ماتاخدوش راحتكم قوي.. أو خدوها، براحتكم.. بس خليكم عارفين إننا يمكن نمشي في أي لحظة.. ماحدش عارف .. وماحدش واخد منها حاجة، بردو ..

شكرًا لحسن استماعكم .. :)