About The 10 Mins Writing Challenge - 3

أحيانًا لما بكتب، ولأن كمان شغلي بيعتمد على الكتابة.. بقف كتير في الأول قبل ما ابدأ في إنه هو اللي أنا هاكتبه ده هياخد مني وقت قد ايه؟! لأني غالبا بانسى نفسي وممكن أقعد اكتب لمدة طويلة لحد ما الموضوع وكل الكلام اللي جوايا يخلص، أو لحد ما اتعب وأقفل من الكتابة كلها على بعضها كدة.. المرة دي بقى علشان أقدر أكمل التحدي لمدة ١٥ يوم، قررت إني أحدد وقت وهو ١٠ دقايق بس أكتب فيهم وبعد كدة أوقف أيًا كان الكلام اللي عندي خلص ولا لأ ..

الفكرة دي لواحدها علمتني كتير .. أولًا، كان بيبقى سهل عليا في أي وقت ابدأ أكتب، لأني كنت بقول لنفسي هم ١٠ دقايق بس اللي محتاجة أركز فيهم دلوقتي وبعد كدة أقوم، ف مش هضيع وقت كتير، بدل ما الوقت ده يضيع في حاجة تانية مثلًا ..
ثانيًا، فكرة انهم ١٠ دقايق بس وعلى الtimer كمان، كانت بتخليني أوقف الدنيا من حواليا وفعلًا أركز في اللي أنا بعمله وبس، لأني لو ضيعت وقت من ال١٠ دقايق دول هضطر ابدأ من الأول تاني ومش هتبقى محسوبة صح ..
ثالثًا، علمتني حاجة أنا عادة بضيع فيها، وهي إني أرتب الأولويات، تخيلوا!! يعني علشان أقدر أكتب أكبر قدر من الأفكار والكلام اللي جوايا في خلال ال١٠ دقايق دول بس، كنت بعدي أي حاجة ممكن توقف سيل الأفكار وأنا بكتب، زي إني أصلح كلمة كتبتها غلط، أو أدور على معنى معين يعبر عن الكلمة اللي عايزة أقولها بشكل أحسن .. وهكذا ..

١٠ دقايق كانوا كافيين جدًا اني أعبر عن فكرة كاملة جوايا وبشكل واضح وكمان كانوا كافيين إني من بعدهم مابقاش تعبت قوي من الكتابة، أو من إني دخلت جوايا زيادة عن اللزوم بشكل ممكن يخليني اتعب بعد كدة .. والعجيب انه تقريبًا في معظم المرات كان الtimer بيرن في الوقت اللي بكون فعلًا خلصت فيه.. مرات كان بيبقى لسة جوايا كلام محتاجة أكمله ف كنت بديله فرصته انه يطلع، بس مش أكتر من ١٠ دقايق تانيين ... وبعد كدة باخد كمان ١٠ دقايق عشان أقرأ اللي كتبته واظبطه وكدة .. : )

#عن_التجربة
#برة_الحلزونة

#10Mins_Writing_Challenge