#245: A Teaspoon Thought...

Once upon a time a teaspoon thought:

"الوقت اتأخر قوي .. النهاردة كان طوووويييييل وحصل فيه حاجات كتيييير ... أيامي المليانة أحداث دي مش دايمًا بتحصل، عشان كدة أنا مبسوطة النهاردة ... أول حاجة عملتها الصبح بدري هي إني أخدت غطس عميييييق جوا برطمان العسل وطلعت وأنا شايلة عسل كتيييير لدرجة إني ماكنتش عارفة أحافظ عليه كله جوا قلبي .. وبعدين أكلتني البنوتة دي اللي أنا بحبها.. قصدي أقول أنها أكلت العسل اللي أنا شايلاه ..البنوتة دي أول واحدة تمسكني من بعد ما كنت نايمة جوا شنطة كدة كبيرة مع عايلتي .. بحب اسمع البنوتة دي قوي وهي بتتكلم مع واحد راجل كدة، هو كمان ساعات بيتعامل معايا، على وقت الفطار وساعات وقت العشاء، بحب أسمعهم وهما بيتكلموا وبيهزروا وبيضحكوا .. واحدة من إخواتي الكبار، قالتلي انه البنوتة دي والراجل ده لسة متجوزين جديد وانه بس عشان كدة هما كلامهم حلو وهزارهم لذيذ .. مافهمتش كلامها قوي وقولتلها مش مهم، المهم إني بانبسط وأنا معاهم.. نرجع للعسل .. حبيت العسل قوي وحبيت إحساسه وحبيت إزاي بيبقى تقيل وفي نفس الوقت خفيف وبيتدلدء مني وأنا شايلاه ... همممم .. بعد فقرة العسل دي، البنوتة غسلتني بالمياه عشان ماابقاش ملزقة كدة من العسل الحلو ده .. وخلتني أقعد مع إخواتي في الكوباية .. وبعدين جه الراجل وأخدني عشان أجيبله شوية سكر.. السكر غير العسل، ملمسه خشن وبيعمل أصوات مزعجة لما باجي أشيله، بس لونه حلو وبيفرحني.. هو مش بيحبني أجيبله سكر كتير، ف كل مرة بيخليني أوقع مني شوية سكر من اللي أنا شيلتهم .. بعد كدة بقى بتيجي أكتر فقرة بحبها .. نزلت في كوباية الشاي وقعدت أدور وأدور وألف كتير وأرقص وأعمل هيصة ودوشة وزمبليطة .. بحب الرقص والدوران جوا أي كوباية، بحس ساعتها إني طايرة وبعمل الحاجة اللي اتخلقت عشانها، ساعات بيسمحولي أرقص وأدوور كتير وساعات لأ، وبيبقوا لفتين تلاتة كدة وبس .. 

مش قادرة افتكر بقى باقي الحاجات اللي عملتها النهاردة، بس أنا مبسوطة، ودلوقتي جه وقت النوم الراحة، أحسن أنا النهاردة رقصت كتير ..

يا ترى بكرة هيبقى حلو كدة زي النهاردة؟!"