#258: الغلط اللي بيعلم!

أنا عرفت غلطي! مع إنه غلط متكرر بشكل يغيظ يعني، لكن المرة دي الغلط غير كل مرة.. المرة دي أنا متقبلة الغلط.. المرة دي أنا كنت متوقعاه!

يمكن عشان عارفة ومتوقعة من نفسي إني هاقع في نفس الغلط، لما وقعت فيه مااستغربتش، ولما مااستغربتش، تعاملت معاه بهدوء وقبول!

كان فيه مقولة لاينشتاين باين بيقول فيه (بما معناه يعني) انه الجنون هو إنك تحاول كل مرة بنفس الطريقة وتتوقع نتيجة مختلفة. أنا بقى كنت كل مرة تقع المقولة دي تحت عيني، كنت أقول اه، أنا بعمل كدة، إذًا أنا مجنونة! 😀 .. المرة دي بقى، أنا على الأقل كسرت القاعدة، اه حاولت بنفس الطريقة، بس المرة دي كنت متوقعة نفس النتيجة، مش نتيجة مختلفة يعني زي ما هو في قانون مقولة اينشتاين ..

وكأني محتاجة أفضل أكرر الغلط ده بنفس الطريقة دي طول الوقت اللي فات ده عشان تيجي مرة وأقدر استوعب وأفهم.. هي المرة دي ... كأني بكرر التجربة بنفس الطريقة بس بعين واحدة تانية غيري، عشان أقدر ألقط هو ايه الغلط اللي بعمله، وليه بعمله، وايه اللي بيحصل بيؤدي ليه.. المرة دي أنا بتعلم من غلطي.. وكأني قاصدة أجرب للمرة التريلييون بنفس الطريقة هي هي عشان بس اتعلم منها أكتر وأكتر!

أنا قدرت ألمس غلطي وأشوفه، يمكن مش قادرة لسة أخد منه وأصلحه، بس أنا الحقيقة سعيدة إني بدأت أشوفه أصلًا .. أومال قبل كدة كان ايه؟! قبل كدة، كنت بتخانق معاه، كنت بلومه، وأقوله: "أنت السبب في اللي أنا فيه! هو أنت مش هتبطل تيجي بقى؟!" مابطلش طبعًا عمره، وبيفضل ييجي بردو، عشان الرسالة اللي عايز يقولهالي أنا لسة ماسمعتهاش! بس شكلي ابتديت أسمعه..

هتقولولي يعني هتبطلي تكرري الغلط ده؟! هاقولكم لأ طبعًا! أنا لسة محتاجة أدخل فيه تاني وتالت عشان أفهمه واتعلم منه! 😌

السؤال بقى: ايه الغلط اللي لسة ماسمحتش لنفسك تتعلم منه؟!