#255: وأنا بتعلم عن الحب ...

هكلمكم عن بنت، بالصدفة من ساعة ما عرفتها وتوطدت علاقتنا وأنا بتعلم منها عن الحب، حتى لو هي مش واخدة بالها، أو هي نفسها متخيلة غير كدة!

علاقتنا بدأت (في خيالي) باحتياج.. كنت محتاجة حد يسمعني ويتكلم معايا كتير عن موضوع معين وكانت هي أكتر حد بيسمعني من غير ما يحكم عليا.. وفي الموضوع ده بالذات أنا اتعلمت منها كتييير جدًا كمان .. وفي نفس الوقت، (في خيالي) كنت أنا كمان بسمع منها عن موضوع شبيه للموضوع اللي أنا باتكلم فيه .. ف كانت بالنسبة لدماغي علاقة بتحقق شروط الحب اللي عندي، هي محتاجالي وأنا محتاجالها، وفيه بينا موضوع وأحوال مشتركة، فبالتالي إحنا كدة غالبًا هنفضل محتاجين لبعض فهنفضل بنحب بعض ..

لحد ما في مرة بدأت أحوال كل واحدة فينا تختلف، بمعنى إني أكون أنا فرحانة، بس هي حزينة، وساعتها لاقيت نفسي مش قادرة بالشكل المتوقع مني إني أقدملها خدمة إني أسمعها، ولا قادرة أستفيد منها بإني أكلمها عن حالي اللي هو مختلف عن حالها عشان قال يعني مايصحش.. وساعتها توقعت إنه علاقتنا غالبًا كدة ومع شوية وقت هتنتهي وتموت، وبناء على خبراتي في العلاقات، والصداقات بالذات يعني، اللي كلهم بحسهم كدة من فوق الوش بس، لكن مش داخلين جوايا وجوا تفاصيل حياتي، قلت انه اللي كان بينا كان مجرد فترة جميلة قربنا فيها بس لأنه كان فيه بينا موضوع مشترك، وخلاص خلص، فخلصت الصداقة!

لكن، الحقيقة هي بجمالها وبعفويتها وبصدق مشاعرها وبحبها الكبير، ماسبتنيش، هي فضلت تسمعني وفضلت تسأل وفضلت تتكلم وتطلب إني أسمعها، وده خلاني أنا كمان أفضل متواجدة في حياتها وأخليها هي متواجدة في تفاصيل حياتي — على الرغم من اختلاف أحوالنا .. ومع كل ده، حياة كل واحدة فينا مش متعلقة بحياة التانية ولا واقفة عليها، لكننا بنلاقي سكون وراحة لما بنشارك بعض حياتنا سوا، على الرغم من عدم احتياجنا الشديد للمشاركة دي .. أو بمعنى تاني، إنه في بدائل للمشاركة دي .. وكمان، قادرين نقدر اختلاف أذواقنا واختلاف اهتمامتنا واننا نسمع من بعض عن اهتمامتنا المختلفة دي بكل حماس وحب!

وشوية بشوية، ومن خلال تعاملاتنا، فهمتني يعني ايه انه علاقتنا ماتبقاش مربوطة ولا مرهونة بموضوع مشترك بينا .. أخر مرة اتقابلنا، كانت أكتر مرة بتوضح ده ليا، لأن فعليًا كل واحدة فينا كانت في وادي ودماغها في وادي بعيد عن التاني، لكننا كنا قادرين جدًا وبشكل حقيقي ومختلف وجديد عليا إننا نكون حاضرين مع بعض ولبعض من غير ما حد فينا يحس إنه مش قادر يعبر عن حاله، لأن حال اللي قدامه مختلف عنه!! ... 🙏🏻💚