#254: معنى عن الحب

مؤخرًا اكتشفت إنه عندي معنى معين عن "الحب" بيخليني دايمًا أخد العلاقات اللي في حياتي كدة من فوق الوش.. المعنى بيقول انه شرط إني أكون بحب حد هو إني أكون بقدم له خدمة ما سواء كانت مادية أو معنوية، ولو ماعملتش كدة يبقى أنا مابحبوش.. الموضوع عندي أكبر من إنه مجرد طريقة تعبيري عن الحب هي إني أساعد اللي بحبه .. الموضوع وصل لإني بقيت ممكن أجي على نفسي كتيييير جدًا بس عشان ابقى باعمله حاجات كتيير عشان اثبتله إني بحبه .. واللي اكتشفته أكتر من كدة هو إني بقدم الحاجات الكتيير دي كلها عشان يبقى الشخص اللي بحيه ده محتاجلي بشكل إلى حدٍ ما كبير فيتعلق بيا، ولما ده يحصل، أحس أنا بقى ساعتها إنه هو كدة كمان بيحبني!

ومن ناحية تانية بردو، قليل قوي اللي كنت بحس بحب حد غيري ليا، لأني كنت بشوف إني يا إما أنا مش محتاجاله، أو شايفة إنه هو مش محتاجلي، أو إني مثلًا مُقصرة في الخدمات اللي بقدمهاله، ف يعني هيحبني على ايه! والخدمات هي من أبسط ما تتخيلوا زي إني مثلًا أكون بسأل وباتكلم بشكل دوري!.. ف بالتالي كان تقريبًا مافيش علاقات في حياتي فيها مشاعر حقيقية، اللي فيها أقدر اعتمد بشكل حقيقي على وجود حد في حياتي بالرغم من بُعدنا عن بعض مثلًا .. أو بالرغم من عدم تعلقنا واحتياجنا الشديد لبعض .. 

فكرة إنه حد يحب حد من غير ما يكون الشخص ده بيعمل للشخص التاني حاجات كانت مجرد فكرة حلوة لكن عمري ما حاسيتها.. ومااقدرش أنكر انه لسة جوايا آثار هذا المعنى العجيب عن الحب .. لكن بدأت أعيش معاني كتير تانية عن الحب خلال السنة اللي فاتت دي .. وده اللي ممكن ابقى أحكي عنه هنا بكرة، لأن وقت النهاردة خلص!