#256: الحب بيصنع المعجزات

بيقولوا الحب بيصنع المعجزات... بس يعني ايه حب؟!

امبارح، ومن بعد ما كتبت عن صاحبتي اللي قلت إني اتعلمت منها معاني للحب.. جت وسألتني: "انتي بجد يا سلمى اتعلمتي مني الحب؟" .. ساعتها هنجت كدة لأني مالقتش إجابة صريحة جوايا، وقلت لنفسي: ايه ده! أنتي كدبتي على البنت وعلى الناس ولا ايه؟! بس ركزت شوية في الإجابة وقلتلها:

"اللي اتعلمته منك بجد هو اني اتصرف وفقًا لمشاعري .. وإني أصلًا أقبل إني بحب وإنها مشاعر طبيعية حلوة وحلو إني أعيشها وانبسط بيها."

الحب مالوش تعريف واضح وصريح ولا حتى معنى محدد ومابيتغيرش .. بس كل اللي أقدر أقوله عن الحب هو إنه من ضمن الخواص بتاعتنا كبني آدمين.. انه يكون عندنا هذه المشاعر الحلوة اللي بتفرح واللي بتخلينا نطلع من مخزون الخير اللي جوانا، الخير اللي ربنا حاطه فينا.. 

لما راجعت نفسي إزاي أنا بحب.. لاقيت إني لما بحب بجد بكون أنا برة الصورة، بلاقي إني مش مستنية مقابل لأي خير بعمله ولو كان الخير ده مجرد ابتسامة.. أنا صدقت انه شعور الحب ده، أيًا كان توصيفه، هو شعور صعب يتوصف لكن كل حد فينا بيقدر يحسه كل يوم وفي اليوم أكتر من مرة..  إحنا بس اللي مش بناخد بالنا .. ولو أخدنا بالنا، هنلاقي الحب في ابتسامة مستخبية من حد غريب في الشارع ليك لما جت عينك في عينه.. في غمزة عين زميلك في الشغل إدهالك وانتوا قاعدين في وسط معمة تسليم المشروع اللي وراكم..  في كلمة بتضحك سمعتها من مذيعة الراديو وأنت راجع أخر اليوم .. وفي كوباية الشاي اللي أخوك بيعزمك عليها وكمان عاملهالك بايده.. وكتير جدًا .. 

الحب عشان يقدر يصنع المعجزات محتاج مننا إننا نصدقه ونحس بيه معظم الوقت ونشوفه في صوره الكتير اللي بيحتويها رحمة ومودة واحترام ومراعاة الحال.. 

يمكن ماتكونوش متفقين معايا، بس قولولي .. بتشوفوا الحب في ايه؟!